曼城半場收禮物

猪拉多纳

21/12/2011
文： 樂比堅尼

今晚英超好戲連場，「曼市雙雄」分途出擊力爭做聖誕一哥！曼城主場對史篤城，雖然曼城早前歐聯出局、聯賽不敗身被打破，隊波亂咗一陣子，但上仗小勝阿仙奴一比○後成功穩住軍心，今晚主場對史篤城，勢必贏波保住一哥位過聖誕，主W冇肉食下，樂比仔建議捧1.52倍嘅曼城半場勝及1.6倍嘅主主！




（有線200及300台周四凌晨3時45分直播）




曼城早前被車路士打破聯賽不敗身後，未有即時洩氣，周日對阿仙奴沉着應戰，結果小勝一比○，順利拎三分，並保持榜首兩分優勢，由於曼聯同曼城都喺歐聯出局，樂比仔相信兩隊下半季會將集中力放晒喺聯賽，變相令弱隊爆冷機會更微。




其實曼城最大優勢就係人多勢眾，好似前線迪斯高、巴洛迪利同埋拿斯尼都非必然正選，輪流落場一來令球員唔敢揸流攤，另一方面亦增加球員飢渴感，加上靈魂大衞施華狀態實在太勇猛，現階段好難有球隊頂得住佢哋，聯賽主場八連勝絕對冇花假。


史篤城４連勝夠皮


史篤城早前聯賽四連敗，但最近又突然回勇連贏四場，不過呢隊波好奇怪，贏夠就自然會收油，唔會長勝落去，畢竟佢哋人腳有限，球隊冇乜野心，自升上英超以來從未連贏五場，睇怕今場都係時候斷纜。史篤城今季八場聯賽作客有五場半場落後，故今場推介半場勝及半全場「主主」畀大家！