諾域治作客屠狼

猪拉多纳

20/12/2011
文： 亨格比利

新升班嘅諾域治今季表現令人眼前一亮，呢隻「金絲雀」雖然缺乏華麗嘅進攻，但機動踢法同不死鬥心就真係睇到亨格比利直豎拇指，今晚佢哋喺英超造訪近況極差嘅狼隊受讓平半，「下盤」梗係捧得過啦！（有線200及300周三凌晨3:45直播）


「大茄」箭頭有貨交


諾域治陣中冇球星，但呢支「平民球隊」勝在實而不華，好似防中巴特拉莊臣、左翼安東尼派京頓同埋守將巴尼特都係拚命三郎，一對「大茄」箭頭史提芬摩利臣同格蘭荷特一個射得一個衝得，今季已合力炮製13個聯賽入波，都咪話唔堅。




反觀狼隊就有頭威冇尾陣，開季兩連捷係威係勢，最近5場聯賽就輸足4場，狀態曳到爆。前鋒奇雲杜里對上一次喺英超入波已經係兩個月前嘅事，球隊家陣靠晒史堤芬費查數胡，樹大招風今晚唔容易搵食。況且諾域治連造訪利物浦同愛華頓都唔使輸，使赦你狼隊？