法蘭克福平手盤咪走保

猪拉多纳

19/12/2011
文： Combo King

阿King今次揀來三場乙組聯賽推介畀大家，重心係德乙聖保利主場法蘭克福，聖保利表面屬於爭升班分子，但佢哋今季「遇強即屈」，面對幾支勁敵都贏唔到，已令球員信心出現動搖，平手盤寧願揀客軍法蘭克福。




（周二凌晨3時15分開賽）




一支球隊要爭聯賽冠軍或者升班資格，最重要唔好失分畀主要競爭對手，否則分數一來一回，影響非常大。聖保利今季整體成績唔錯，但面對前列強隊往往處於下風，包括季初被法蘭克福逼和，主場輸畀杜塞爾多夫，以及同格雷特霍夫打和，可見聖保利難登大雅之堂。




法蘭克福今季十八場聯賽僅一敗，平手盤買佢哋基本上已可封蝕本門，法軍人腳質素喺聖保利之上，四位前鋒基卡斯、艾迪素、賀化及馬莫亞都有出色表現，佢哋有機會落場都好搏命。兩位中場高拿及美亞後上攻門亦相當有威脅，法蘭克福進攻多元化，作客贏埋唔出奇。


甘岡主場有望反彈


荷乙阿梅爾城主場對FC燕豪芬，FC燕豪芬雖然排名高對手一大截，但近期表現走樣，連續三場聯賽都贏唔到，而且佢哋過去四次聯賽作客阿梅爾城都輸波而回，今仗讓唔起阿梅爾城。法乙甘岡作客兩連敗，今仗回師主場係時候反彈，可望擊敗色當。