水晶宮受讓明醒你

猪拉多纳

19/12/2011
文： 麥馬拿仁

今晚英冠獨腳戲，外號飛鷹（Eagles） 的水晶宮主場鬥伯明翰。伯軍本季分心歐霸疲於奔命，球隊兵微將寡，近兩次踢完歐戰後，聯賽都輸波而回。水晶宮夠晒韌力，本季主場十四戰十三場有分落袋，不敗率逾九成，水晶宮「讓球主客和」受讓筍極，平手盤亦好值得捧場！（now 638周二凌晨3時45分直播）




伯明翰本季有唔少主力離隊，但領隊曉頓有料到，激起球員鬥志，於聯賽、歐霸兩邊戰線咬緊牙關，九月尾開始曾錄得六連勝。但花無百日紅，始終球隊人腳唔夠用，連場征戰後狀態曳、傷兵來，近期聯賽戰績低落，上周中歐霸雖贏馬里博爾，但最後都要於歐霸盃出局。


伯明翰歐戰後腳軟


伯明翰終可將注意力集中於聯賽，但一周雙賽的確惡頂，前兩仗歐戰後，佢哋作客分別不敵雷丁同卡迪夫城，而且一球不入，今戰讓波相當擇使。




水晶宮本月頭於英聯盃淘汰曼聯，球員信心增強唔少，而且佢哋於主場出擊真係未驚過，本季喺自己地頭只輸過畀米杜士堡但贏過韋根，對黑池、韋斯咸、修咸頓、雷丁等勁旅都保不敗，今場「讓球主勝」受讓極好路，但嫌1.48倍冇肉食，平手盤捧主隊亦坐和望贏。