季軍戰艾薩德法甲雙刀「柏」住上

猪拉多纳

18/12/2011
文： 走肖

世冠盃季軍戰今日喺橫濱日產球場上演，柏雷素爾對艾薩德（左圖前）唔止關係50萬美元獎金，仲係「亞洲最強」牙骹戰，弊在柏隊有中場雙核李安度杜明基斯同栗澤僚一停賽，艾薩德有法甲雙刀尼安同卡達基達孭飛，受讓半一有計。（有線61、64、201及204周日下午3:30直播）


柏雷素爾雙核停賽


兩隊都係首次出戰世冠盃，東道主日職冠軍柏雷素爾先後砌低奧克蘭同蒙特雷入4強，即使以1:3不敵山度士，其實已有晒交代。可惜，分別孭起中場攻守責任嘅李安度杜明基斯同栗澤僚一，同樣累積兩面黃牌要坐波監，當中李安度杜明基斯更加係今季日職最有價值球員，冇佢哋壓陣踢落爭好遠。




另一方面，艾薩德喺4強淨吞巴塞隆拿4蛋，表面好流，但其實佢哋喺今屆亞冠盃贏過水原藍翼同全北汽車，絕對唔係弱嘢，除咗教練科沙迪帶過烏拉圭國家隊，兩大射手尼安同卡達基達又分別効力過里昂同馬賽，就算中堅穆罕默德卡蘇拿要停賽，照計佢哋都會為季軍、殿軍50萬美元獎金差額同尊嚴而戰。