烏甸做些路迪細界

猪拉多纳

15/12/2011
文： Mic少

歐霸盃I組生死戰，烏甸尼斯主場對些路迪，烏甸和波就可以出線，但輸波就立即出局！以呢支意甲二哥主場九連勝強勢，晉級機會相當高，問題係意大利球隊作風保守，今仗或會以穩字行先，即使贏都係小勝，主W僅1.48倍，寧揀1.82倍入球細。




（有線61及201台周五凌晨4時05分直播）


和波夠出線施穩字訣


烏甸尼斯憑傳統意式穩守突擊踢法，無論聯賽或歐霸盃，都取得不俗成績。不過弱點亦非常明顯，就係攻力差，即使位居意甲次席，但入球數字僅多過尾二路華拿三球，五場歐霸盃分組賽亦只入五球。另外，烏甸太依賴老將迪拿達利入波，但佢已三十四歲，開始未能兼顧雙線作戰，教練古度連上輪分組賽畀佢休息，結果只能同雷恩悶和○比○。烏甸既然和波都出線，古度連可能又收起迪拿達利，屆時更加欠缺破門板斧。




些路迪必須贏波，先至可以出線，但蘇超水準近年逐漸被歐洲其他聯賽拋離，兩大班霸格拉斯哥流浪及些路迪都冇作為。事實上，些路迪早於附加賽已被錫永淘汰，但因為對手派違規球員上陣，被取消資格，先至可以後補進身分組賽，根本唔夠班。烏甸近九場主場僅失三球，些路迪想入波極之困難。