聖日耳門強陣搶W爭出線

猪拉多纳

14/12/2011
文： 朱楓

由於巴黎聖日耳門（PSG）目前喺歐霸盃F組出線形勢被動，相信呢支法國班霸今晚都會做足本分贏波，畢竟PSG喺王子球場已超過5年未輸過，對住穩獲首名出線、今晚隨時Hea踢嘅畢爾包，PSG有權大捷，「讓球主勝」有2.4倍值得捧場！（有線64及204周四凌晨2:00直播）


先講F組形勢，畢爾包攞到首名晉級資格，巴黎聖日耳門同薩爾斯堡同得7分，不過薩爾斯堡因對賽成績較佳暫列次席，PSG今仗一定要贏或和，再望薩爾斯堡失分先有望後上出線，雖然形勢較被動，但以PSG嘅人腳，今戰一定會搏晒命向球迷交代，以全取3分為目標。

近5年歐戰主場11勝7和

再講，PSG喺歐洲賽主場惡到爆，自06年11月不敵特拉維夫夏普爾，打後18仗喺王子球場出擊錄得11勝7和，勁恐怖。睇番數據，其實PSG對歐霸盃都幾有誠意，往往派強陣出擊，之前5場分組賽，王牌柏斯托尼4次披甲，射手利尼仲踢到足添，咪忘記教練高保亞爾盛傳快將被炒，為咗個飯碗，今晚根本冇可能再留力。

畢爾包篤定首名留力西甲

西班牙球隊畢爾包今仗有中場查維馬天尼斯停賽，加上佢哋已獲首名出線權，今仗攞正牌踢風流波，教練比爾沙亦話明今仗只會出後備兵，畀班主力抖抖，應付嚟緊周末西甲對薩拉戈薩嘅賽事，今鋪作客去到巴黎，輸兩粒理論上係最低消費。