祖雲達斯追殺病「狼」

猪拉多纳

12/12/2011
文： 朱楓

今晚意甲羅馬主場大戰祖雲達斯，形勢可能會一面倒，事關「雌狼」大鬧後衞荒，相反祖記愈戰愈勇，朱楓睇好「斑馬兵團」可以「殺破狼」，送對手教練安歷基上斷頭台，祖記讓平半捧上盤！（now633及660台、中央5台周二凌晨3:45直播）




今季積極「巴塞化」嘅羅馬，近排黑到爆，繼不敵烏甸尼斯後，上場對費倫天拿又慘吞3蛋，最慘係前鋒保贊、中場加高同中堅祖安領紅今晚齊齊停賽。據講羅馬啲Fans已經失去耐性，賽後要求教練安歷基下台，有極端球迷甚至走去訓練場侮辱班職球員。


羅馬3件停賽鬧後衞荒


由於近況太差，上一代羅馬王子簡連尼亦出聲叫安歷基搵番托迪做進攻核心，前車路士領隊安察洛堤更開到口話想教羅馬，不過朱楓覺得安歷基今晚都好難帶領羅馬反彈，事關除咗以上3名主力停賽外，仲有後衞貝迪素、卡積亞、卡斯錫迪倦勤，焗搵迪羅斯客串中堅，中場就要出年僅17歲嘅費達歷高韋維安尼，殘陣到咁你話點捧？


祖記競爭劇烈個個搏命


另邊廂嘅祖雲達斯今季弗爆，開季至今未嘗一敗。已被貶為後備嘅迪比亞路早前被人踢爆頭縫咗8針，本來應該好好休養，點知上周中意盃對博洛尼亞竟紮住上陣打足120分鐘，仲話今晚作客羅馬不勝無歸，睇得出祖記內部競爭激烈，根本唔容許一班正選有任何閃失。祖記今場除咗胡仙歷因傷未能倒戈外，連中場派路都刑滿，配合今季弗到爆嘅馬治斯奧、柏比同馬特尼，要屠殺「雌狼」絕對係Easy Job！