車仔撞曼城好大劑

猪拉多纳

12/12/2011
文： 樂比堅尼

香港時間周二凌晨英超重頭戲，車路士主場迎戰曼城。車仔近期有回勇迹象，接連兩場具說服力嘅大勝，令球隊士氣大振，不過車仔今季對強隊嘅成績實在太得人驚，今場讓平半樂比仔有保留，既然車仔防線不穩，聯賽主場又全數開大，今場一於追大盤！




（有線200及300台周二凌晨4時直播）




處於過渡時期嘅車路士，季初成績令人失望，領隊保亞斯終於大刀闊斧變陣出擊，棄用林柏特及費蘭度托利斯兩名大牌，中前場重用今季先加盟嘅四名球員魯爾梅利斯、奧里奧爾羅美奧、史杜列治（外借收回）同埋桑馬達，終於踢出保亞斯執教波圖時期嘅風格。


杜奧巴回復魔獸本色


早前盛傳會被清洗嘅杜奧巴，自從表明心迹話會適應新踢法，果然得到保帥重用，上仗對華倫西亞更梅開二度回復「魔獸」本色，依家成隊車路士生番晒，相信要喺史丹福橋球場爭取入球一啲都唔難！




不過，車路士今季最為人詬病嘅地方，就係防線極多漏洞，經常犯低級錯誤，而且「遇強即屈」，今季對曼聯、阿仙奴同利物浦都慘淡收場，其中主場對阿仙奴輸三比五可用災難來形容，另外兩場聯賽對利物浦及曼聯都係輸波兼開大，所以樂比仔認為今場捧大盤更着數。


曼城英超入波王


另一邊廂，今季聯賽仍然保持不敗嘅曼城，係英超入球最多球隊，平均每場入球超過3球，淨係一隊都夠開大，加上佢哋今季十四場聯賽有十二場開大，大盤比率極高，今場大盤有1.72倍其實相當吸引。