車迷唔撐場難擒喜鵲

猪拉多纳

03/12/2011
文： 江忠德

球隊有大水喉射住固然重要，但係最大嘅精神支柱始終係來自球迷，車路士喺聯賽盃畀利物浦淘汰，主場球迷一早起身走人，佢哋以實際行動宣洩不滿，正正反映出車仔依家幾咁低迷，今晚作客紐卡素未必有運行。




藍戰士身為勁旅，竟然近4場輸3場，球迷已經再難容忍，更何況上場聯賽盃對手利物浦都冇用「夫添」出擊，咁樣喺自己地頭輸波邊有藉口，球迷罕見地提早離場，咁樣好傷士氣。


紐卡素英超失球最少


之前一早都講過車仔老兵太多，好難發揮出保亞斯主張嘅進攻戰術，況且佢哋放棄高壓防守體系，導致進退失據、冇晒節奏，即使入埋都唔夠輸，今晚對住防守咁勁嘅紐卡素隨時會冇晒符。




對家「喜鵲」喺上半季踢和阿仙奴、熱刺、曼聯，只輸畀曼城，上半季最強對手就只剩番車仔同紅軍，好大機會踢完半程都仲留得番喺前4位。佢哋有自知之明，做好防守伺機進攻，所以依家失波最少，加上連運氣都有埋，相信有十足信心抗衡車仔。