紅魔頹勢啃唔落維拉

猪拉多纳

03/12/2011
文： 力奇

今晚英超尾場有阿士東維拉主場對曼聯，紅魔近況實在麻麻，加上佢哋近3季作客維拉公園又例牌失分，唔到你唔信邪，曼聯讓波，我捧2.2倍「讓球主勝」。（有線200及300、廣東體育周日凌晨1:30直播）


贊拿斯擔正 柏杜夫傷愈


維拉近6戰只得1勝2和3負，表現無疑令人失望，但上周佢哋作客史雲斯嗰場波，中場贊拿斯同班倫都有後備上陣，操番起之後，今仗有望復任正選，而且大將柏杜夫亦及時傷愈，中場連繫力大大提升，強陣出擊，有本錢一戰o架。




曼聯呢邊連續3場和波，無論對賓菲加定紐卡素都係拉唔開比分，最後慘被逼和，去到周中，佢哋又喺聯賽盃畀水晶宮踢出局，咪話唔洩氣。雖然周中冇份落場嘅朗尼、查維亞靴南迪斯同迪基亞今仗會擔正，不過睇番佢哋近3季作客維拉次次和波，以佢哋近排咁頹嘅狀態，睇怕都係惡唔出樣咯。