迪科爾請體能大師加操

猪拉多纳

30/11/2011

熱刺今季踢得咁好，連迪科爾都冇乜機會擔正，不過呢位射手絕對冇吞Pop，而且仲暗中請咗法國著名體能訓練大師幫手操弗，每日嘅球隊練習之外秘密進行特訓，誓要爭取機會重奪正選位置！

電話遙控指導練體能

由於雲達華治受咗傷，迪科爾近期終於有機會擔正，據英國《每日郵報》爆料，原來迪科爾由今個夏天開始，已經搵咗70歲嘅法國體能訓練大師達拉奧做私人教練，迪科爾承認：「我嘅付出冇白費，而且仲有好大收穫，我覺得自己充滿力量！」


達拉奧雖然唔係長期留喺倫敦，但就每日會同迪科爾傾電話教佢點做，迪科爾話：「有時我冇份比賽，我就會坐喺度等佢電話，達拉奧會要我用紙筆抄低要做嘅事，就好似學生做功課一樣，但真係好有幫助。」據報達拉奧下個星期會再親赴倫敦指點呢位英格蘭前鋒，大家認真要(目及)實迪科爾嘅表現。