布拉加腳風順過柔順劑

猪拉多纳

30/11/2011
文： Wendy

上周歐聯激戰過後，本周論到歐霸盃擔正，歐洲足協今年安排賽事真係抵讚，球迷唔使連續幾日通頂睇波，我哋講波嘅行家都可以有回氣時間啦！講起今晚歐霸盃賽事，肯定以H組形勢最為激烈，伯明翰、布魯日同埋布拉加同得七分，喺仲有兩輪賽事情況下，三隊都有機會出線。


今季降落英冠嘅伯明翰近況只係一般，近五場聯賽僅一勝三和一負，唯一勝仗係二比一贏榜下游嘅般尼，而近四仗均有失球，可見應付歐洲賽，對佢哋嚟講開始感到吃力，今次作客布拉加，實在難樂觀。


布拉加陣中巴西前鋒洛迪高利馬近兩場聯賽入三球，腳風順過柔順劑，面對防守力一般嘅伯明翰，隨時可以再有士哥！而布拉加今季聯賽主場仍保持不敗，上次作客亦可輕取伯明翰三比一，所以今場值得信賴，小女子會支持主勝同入球大。


（有線64及204台周四凌晨2時直播）