巴塞誓炒華歷簡奴振聲威

猪拉多纳

29/11/2011
文： 亨格比利

受咗傷嘅獅子係最得人驚，巴塞隆拿剛啱畀基達菲打破不敗身，「地上最強」為咗省靚招牌重振聲威，今晚又點可以放過到訪嘅華歷簡奴吖？就算巴塞讓到「-2」，1.54倍「讓球主勝」都可以放心捧。（now632台及廣東體育周四凌晨4:00直播）




原先呢場波係下個月踢，但為咗遷就巴塞征日踢世冠盃，西甲賽會特別將今戰提前舉行。呢支西甲班霸上周日輸畀基達菲之後，目前已經落後「一哥」皇馬6分，據《每日體育報》嘅網上投票顯示，有43%巴塞躉睇死愛隊衞冕無望，並且有71%球迷認為巴塞喺「國家打吡」前唔能夠縮短同皇馬嘅分差。


地上最強「-2」例派蛋


面對球迷嘅質疑，「地上最強」巴塞唯一可以做嘅就係踢番場好波，今晚對華歷簡奴正正係好時機。教練哥迪奧拿收到好消息，中場孖寶恩尼斯達同法比加斯齊齊克服大腿傷患，並喺尋日重新參與操練，加上重拾狀態嘅柏度洛迪古斯可以擔正，陣容比上仗鬥基達菲更完整。




巴塞話晒都係西甲「主場王」，新季7戰獲6勝，場均轟入4.28球，撞啱華歷簡奴有守衞羅拔圖迪圖坐波監，教練辛度華焗住要搵坐冷板坐到懵嘅蘇列頓擔正，呢位右閘落到場隨時手騰腳震，畀恩尼斯達同韋拿玩殘都似！況且巴塞近兩次喺西甲開出「-2」都冇問題，分別大炒馬略卡5:0同薩拉戈薩4:0，今仗為面子同成績，梗要做番齣好戲啦！