甲府 新潟駁火「大」手交易

猪拉多纳

27/11/2011
文： BlackJack

日本波玩埋呢兩輪就收工，啲關鍵場次冇咁多古靈精怪，所以今日條三串一就揀咗兩場日職、日乙波，用甲府風林個入球大，過落去德島漩渦和波，同埋荷乙丹保殊個客勝度。




甲府風林今日主場出戰新潟天鵝，係佢哋有冇得留喺日職嘅關鍵戰，事關甲府截至尋日落後尾四嘅浦和紅鑽6分，剩低兩場波必須全勝，然後望浦和失分至掂，所以今日對住上咗岸嘅天鵝一定死砌。




但係高佬夏雲拿坐波監，可以話係甲府嘅致命傷，冇咗條攻堅大杉仲要搶攻，一定顧此失彼，撞啱天鵝全無包袱，仲趁住曹永哲向南韓U23報到，搵博緊上位嘅川又堅碁拍般奴盧比斯衝鋒，放膽同甲府對攻，呢啲環境兩隊都有波入好正常，入球大自然諗得過。（now 633台周日中午12:00直播）


德島 鳥棲以「和」為貴


日乙升班關鍵戰德島漩渦對鳥棲砂岩，兩隊同分排响2、3位，由於佢兩隊下一場謝幕戰，對手都係中下游球隊岡山綠雉同熊本羅亞素，3分應該走唔甩，今場即使打和各執1分，都啱啱好食住第4位、尋日以2:0贏咗湘南比馬嘅札幌岡薩多，可以一齊攜手升上日職，咁又有乜必要打生打死呢？事實上今日邊隊輸波，極可能畀札幌過頭跌落第4，咁捉蟲嘅嘢冇人肯制呀嘛，一於博和啦。


丹保殊弗爆搶攻奧斯


至於場荷乙奧斯對丹保殊，丹保殊近期愈戰愈勇，已經5戰不敗，最近3場波仲入咗12球，惡成咁應該有條件小勝6場冇贏過波嘅奧斯，客W值得一敲。