富明尼斯鬥志「高」抵撐

猪拉多纳

27/11/2011
文： 朱楓

同大將續約、又準備買勁人，雖然富明尼斯喺巴甲爭標機會已經好微，但睇得出佢哋好有心爭來屆南美自由盃入場券，今晚主場對住華斯高，平手盤可謂坐走望贏格！（開賽時間：周一凌晨3:00）




巴甲仲有兩輪就煞科，第二位嘅華斯高暫時落後榜首哥連泰斯2分，至於排第3嘅富明尼斯就落後華斯高3分，落後哥連泰斯5分，爭標機會唔大。不過佢哋為鎖定前三名，直接參加來屆南美自由盃分組賽，日前先同中場大將迪高續約至2012年，下個禮拜亦好大機會簽入前高士路攻擊中場華拿，睇得出野心超大。


華斯高南球盃大戰未回氣


事實上富明尼斯近況弗到漏，對上2場全勝勁入9球，單係前鋒費特就省咗7粒，加上後防又有今季巴甲撲出最多12碼嘅前利物浦門將迪亞高卡華利尼把關，朱楓真係唔覺得佢哋會失分畀華斯高。




對家華斯高為後上爭標，今場不容有失。不過佢哋啱啱周中先喺南美球會盃4強主場大戰智利大學，都咪話唔攰，最慘前鋒艾達路爾斯因斷腳已提早收咧，中場大將菲臘比佐治又未必踢得，今仗真係隨時撻Q。