史浩克作客食住多蒙特

猪拉多纳

26/11/2011
文： 蘇斯黑柴

今晚德甲重頭戲當然係魯爾區打吡大戰，多蒙特主場迎戰史浩克04。主隊係上季聯賽冠軍，客軍係上季德國盃冠軍，呢個組合向來係德國最矚目對決，兩軍係世仇中嘅世仇，史浩克牌面略居下風，但多年來作客西法倫球場踢打吡戰特別有心得，黑柴推介2.25倍嘅史浩克「讓球客勝」。




（有線61及64台周六晚10時30分直播）




多蒙特上輪作客擊敗班霸拜仁，但要留意佢哋係拜仁剋星，已經連續三次喺聯賽成功劏「仁」，不過面對史浩克就向來冇計，近十二次主場對史浩克只錄得一勝五和六負劣績，而且周中啱啱作客硬拚完阿仙奴仲要輸波，體力受損之餘，仲有施雲賓達同馬里奧葛斯傷出，前者重傷肯定有排抖，後者大腿肌肉拉傷亦上陣成疑，加上中堅蘇保迪繼續因傷缺陣，兵力減弱。


多蒙特冇馬里奧葛斯例輸


今場黑柴建議大家賽前留意出場陣容，因為多蒙特有冇馬里奧葛斯非常重要，未計今日凌晨場獨腳戲，今季聯賽踢咗十三場八勝二和三負得廿六分排第二，但今季馬里奧葛斯只缺陣過兩場，面對哈化柏林同漢諾威都輸波，今晚如果葛斯唔出得，捧史浩克就可以大力啲。




史浩克都有賀維迪斯同法芬繼續因傷缺陣，但上輪一樣以四球輕取紐倫堡，自新帥史堤芬斯上任後，七場比賽五勝一和一負，狀態出色，攻擊線上亨特拉爾、魯爾同賀治比都勇達巔峰，今晚強勢作客西法倫球場，就算主隊有馬里奧葛斯都有一戰之力。