熱刺得中場得天下

猪拉多纳

26/11/2011
文： 山度士

英超比西甲及意甲優勝之處，在於整體水準高，現時排頭七位球隊，演出都獨當一面，隨時有機會威脅曼城榜首位置，其中熱刺近期走勢非常凌厲，已殺上第三位，仲要踢少一場，屬於近年代表作。或者熱刺未必對爭標抱有太大期望，但肯定渴望奪取下屆歐聯入場券，熱刺今晚作客西布朗，又係搶分良機，客勝機會高。




（有線202及302台周六晚11時直播）




熱刺近九場聯賽贏八場，包括擊敗利物浦及阿仙奴，可以穩坐老三位置，絕對實至名歸。度士最欣賞熱刺中場線，雲達華治、莫迪歷、柏加、加里夫巴利，有技術、速度及截擊力，組合更勝曼聯及車路士。得中場、得天下，只要保持人腳完整，熱刺喺英超唔怕任何球隊。


作客夠贏西布朗


西布朗級數明顯落後前列球隊一大截，今季對曼聯、車仔、利物浦及阿仙奴全敗收場，只能喺中下游球隊身上搶分，唔好期望今仗可以製造爆冷賽果。西布朗另一個弱點係攻力差，踢十二場聯賽只入十一球，欠缺反擊能力，估計到時都係捱打居多，今場落敗好正路。




山度士：前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。