烏甸羅馬駁火做「大」騷

猪拉多纳

25/11/2011
文： 朱楓

今晚意甲有場前列大戰，由烏甸尼斯主場鬥羅馬。「雌狼」嚟緊會進入魔鬼賽程，呢場對住最易食嘅烏甸，肯定想打好個底，不過烏甸今季主場威力驚人，考慮到兩隊都有一定火力，朱楓覺得1.92倍玩大會比較穩陣！（now633及660台、廣東體育周六凌晨3:45直播）


「雌狼」冇托迪未驚過


開季戰績麻麻嘅羅馬，近期喺安歷基執教下愈踢愈好，上輪主場贏萊切後取得兩連勝。雖然中堅貝迪素早前重傷宣布今季提早收咧，好彩另一中堅、丹麥國腳卡積亞上場對萊切及時復出，而且同軒斯拍得鬼死咁好，賽前卡積亞就話嚟緊接連對烏甸尼斯、費倫天拿、祖雲達斯同拿玻里嘅賽事好關鍵，希望未來4仗至少可攞到9分，殺入爭標行列。其實羅馬絕對有呢個本錢，好似今場咁，雖則話「王子」托迪同波里路未必踢得，但前線仲有拉美拿、奧斯華度及保贊可供選擇。


烏甸主場勁坐底入2粒


烏甸尼斯今季延續強勢，暫時排第4，比第5位嘅羅馬仲要多4分。雖然射手迪拿達利日前接受訪問時，話班波今季首要目標係達到40分嘅護級安全線，但朱楓覺得佢只係謙啫，皆因烏甸今季主場超勁，自歐聯附加賽不敵阿仙奴後，打後7場錄得全勝佳績，有6場仲入2球或以上，今場點睇都係捧入球大着數。