日本趕住歎細界

猪拉多纳

22/11/2011
文： 蘇豪

2012奧運外圍賽亞洲區C組賽事，日本U23作客面對巴林U23，日軍召入大批日職猛將，包括大迫勇也、山崎亮平及永井謙佑等射手，星味十足，但大軍剛過去周日先到埗，需時適應中東氣候及時差，今場小勝機會較高，要細盤！（now 671周二晚10時30分直播）




奧運外圍賽亞洲區踢到第三圈，十二支球隊分成三組，每組首名直接取得明年倫敦奧運入場券，次名仲要再踢附加賽。日本今次被編入Ｃ組，單睇實力的確鶴立雞群，不過，同組對手敍利亞亦非泛泛之輩，為免影響出線機會，今仗面對次級球隊巴林絕對不容有失。




日本今次強陣出擊，前線人腳極強，包括名古屋鯨魚射手永井謙佑、鹿島鹿角箭頭大迫勇也及磐田山葉前鋒山崎亮平，仲有慕遜加柏球星大津祐樹，火力唔講得笑。日軍隊長山村和也受傷缺陣，永井謙佑被委任為隊長，難得有機會擔大旗，肯定會分外落力。


巴林技不如人必死守


不過，日軍剛過去周日先到達巴林，仍然需時適應當地氣候及時差，到底能否踢出水準，仍是未知之數。日本首場分組賽面對馬來西亞，賽前唔少人認為球隊可以輕鬆贏波，結果只能小勝二比○，反映大軍只以三分為目標，今次作客出戰，會先穩住後防，之後慢慢組織攻勢。




巴林首戰作客敍利亞輸一比三，後防發揮麻麻，今場硬撼日本，首要目標為做好防務，避免再次失利。日軍級數較高，預期可以控制戰局，但要於客場連番撕破對手防線絕非易事，今場客勝偏熱唔抵玩，玩入球細更好分！