柏雷素爾大步檻過

猪拉多纳

20/11/2011
文： 蘇豪

日職爭標戰進入最後直路，柏雷素爾今午作客清水心跳，柏軍近三戰轟入十三球，火力超強，雙鬼李安度杜明基斯同佐治韋拿愈戰愈勇，但今場對手心跳亦非善類，兩軍鋒力勁，捧大最好！




（now 633及660周日中午12時直播）


兩軍鋒線都猛火


柏雷素爾重返日職首季表現一鳴驚人，目前排第二，與名古屋鯨魚同分但少踢一場。為創造奇迹，餘下三輪賽事都會當決賽打真軍。柏軍今季戰績突出，皆因中前場多位球員交足貨，兩位巴西外援李安度杜明基斯同佐治韋拿士哥達到雙位數字，加上土炮田中順也貢獻十三球，呢個攻擊鐵三角極具威力。計同聯賽及盃賽，球隊近三戰入十三球，數據冇花冇假。




另一邊廂清水心跳今夏簽入前阿仙奴瑞典球星龍格保，此子加盟後表現唔算突出，反而小將大前元紀愈踢愈好，成為球隊進攻重心。心跳上場於天皇盃大炒鳥取飛翔五比○，老將高原直泰又有建功，大軍近三場轟入十球，攻力同樣極強，今次對住柏雷素爾唔會守。翻查往績，兩軍近三次交手同樣開大，大盤要追。




同日大阪櫻花主場對神戶勝利船，櫻花屬正宗神經刀，早前主場對甲府風林大敗，跟手作客磐田山葉大勝，完全捉唔到路，不過，球隊已經連開九口大，未有斷纜迹象，不妨再追多口！