法國冇鬥心入球細抵諗

猪拉多纳

11/11/2011
文： 自由恒

今日焦點毫無疑問係歐洲國家盃附加賽，冇份參戰嘅其他星級國家隊，都會把握空檔踢熱身賽，個別更順便Show吓新波衫，相信除咗英格蘭要努力測試缺少朗尼嘅陣式之外，其餘11支已躋身來年歐國盃決賽周嘅球隊，踢友賽戰意係點，真係幾難預測。


玩熱身賽最緊要揀夠正氣嘅球隊，荷蘭、德國、瑞典都係靠得住，佢哋爭勝決心相當之強，最緊要係肯搏命去入多幾球，至於法國，雖然已經連續15場不敗，但卻係公認嘅衰波，近6場比賽只得1仗入多過2球，火力一向麻麻，最後一輪分組賽打和波斯尼亞都夠出線，結果佢真係唔贏畀你睇，今晚主場迎戰美國，仲有曼城中場拿斯尼退隊，真係捧唔過。

美國射手當路雲退隊

對家美國自從由「金色轟炸機」奇連士文領軍之後，唔單止見唔到有強勁嘅火力，仲要大鬧入球荒，近4場只係入得1球。由於今場只係場無關痛癢嘅友賽，美國就有前鋒當路雲因要備戰美職總決賽缺席，相信面對決心唔大嘅法國，亦唔容易爭取入球，1.65倍入球細最值博。（now714台周六凌晨4:00直播）