黃金海岸聯受讓諗德過

猪拉多纳

11/11/2011
文： 立民推介

打開面書同各大討論區，滿眼都係炒iPhone 4S必賺攻略嘅新聞，各方陣營嘅排隊黨經已進駐港島總壇，務求撈番筆。家陣真係乜都有得炒，好似嚟緊「2012倫敦奧運」，聽講都有唔少國內禮品店大規模搜羅緊門券做推廣，聽講話7.27開幕禮嗰張飛已升價十倍喇！


哈！每見「炒」機就例必群情洶湧，但啲人好似已經唔記得「機」字之前可能係「危」字，計我話與其四圍撲飛（門票同機票），不如到時留喺屋企睇「有線」好過。

阿德萊德聯5仗失11球

講起一窩風追捧，三年前澳職「風頭躉」、有「紅軍」之稱嘅阿德萊德聯都係球迷追捧熱隊，逢親佢哋主場出擊，「主勝＋細」係保證。可惜呢隊波今非昔比，主場唔再神奇之餘，今季後防亦唔見得穩陣，五場就已經失咗十一球。


你問我點解？因為阿德萊德聯中場做得唔好，成日失控球權囉！如果古倫教頭繼續重用名氣大但轉數慢嘅烏克蘭國腳列夫真高同本地兵迪利夫斯基，相信失波陸續有來。


反而「紅軍」今場對手黃金海岸聯今季換血升級，大手買入荷蘭球員，表現對辦。今場佢哋嘅中場比克文斯同前鋒歷達斯應該可以喺主隊嘅穿窿後防度搵到「士哥」。我有信心黃金海岸聯喺受讓情況下成功搶分，要好分頭，就可以一試和波，當然「讓球客勝」都唔錯吖！


（有線64及204台周五下午5時直播）