米路打氣：咪當伊拉克係巴西

猪拉多纳

10/11/2011

米路天奴域寄語中國將士：最緊要有信心！前中國國家隊主帥米路天奴域於大戰前夕激勵國足將士，強調伊拉克唔係巴西，只要中國隊對自己有信心，發揮應有水準，絕對有條件贏波。


眼見中國出線形勢不利，米路天奴域都忍唔住現身為球隊打氣：「我係中國隊忠實粉絲，希望佢哋相信自己，信心就係贏波最大武器。」呢位名帥承認唔多清楚國足備戰情況，但相信球隊有能力獲勝，仲提供爭勝錦囊：「呢類生死戰唔好諗咁多，全神貫注比賽，打出自己水準，伊拉克又唔係巴西，使乜驚喎！」

建議甘馬曹用李瑋峰

雖然中國上次主場輸畀伊拉克，但米路天奴域認為國足實力較強：「我睇咗兩隊上次交手，中國無論戰況或射門都佔先，但因為太大壓力頻頻失機，今次一定要先減壓，我希望甘馬曹可以帶領國足贏波，祝佢哋好運。」米路天奴域仲建議甘馬曹重用李瑋峰，希望呢位老將可以憑經驗協助球隊爭取佳績。