拿玻里上盤趁「祖」買

猪拉多纳

06/11/2011
文： 鄭少偉

本地聯賽同銀牌呢幾個星期都休戰，但「亨利」就梗係冇得休息！難得可以睇波睇夜啲，梗係要做足功課刨啲好嘢介紹畀大家！今晚意甲就有場重頭戲，由拿玻里主場迎戰今季不敗嘅祖雲達斯，前者今季踢完歐聯後轉戰意甲戰績彪炳，今晚小讓祖記平半，「亨利」選擇上盤輸半博全。（now633台周一凌晨3:45直播）


前線猛火唔怕祖雲達斯


貼波之前有啲嘢想同大家傾吓，就係拿玻里同祖雲達斯陣中，各有一位表現相當搶鏡嘅意大利國腳、中文譯名僅差一個字嘅馬治奧同馬治斯奧之對決，個譯名咁接近，唔知會唔會難到今晚負責旁述嘅講波大佬呢？嘻！嘻！




馬治奧同馬治斯奧雖然踢唔同位置，但就有好多共通點，都係鍾意滿場飛，前又見佢哋、後又見佢哋，兼且唔錫身極有球味，更重要係佢哋兩個後上射門都有一手，周不時失驚無神殺對方後防一個措手不及，今仗淨係睇佢哋鬥法就夠過癮啦！




講番場波，雖然拿玻里上周中歐聯輸波，但大家千祈唔好因為咁睇低佢哋，要知道對住拜仁慕尼黑，就算係巴塞、皇馬都唔敢話贏梗，拿玻里能夠作客都入到兩粒僅敗，證明前線火力夠猛料。睇埋個績，拿玻里之前3場歐聯後嘅聯賽都未輸過，錄得2勝1和咁架勢，贏嘅仲要係米蘭雙雄喎，咁堅唔係唔捧呀？