漢堡送上門餵利華

猪拉多纳

05/11/2011
文： 蘇斯黑柴

德甲尾場利華古遜迎戰漢堡，漢堡近季作客利華屢有佳作，但今仗面對嚴重傷停問題，搶分難度高，黑柴相信利華古遜有力小勝對手，若嫌1.5倍主Ｗ冇肉食，可敲3.5倍「讓球和」。




（有線61及201台周日凌晨1時30分直播）




漢堡近六次作客利華古遜只曾一敗，球隊近三場聯賽亦一勝兩和，新帥芬克上任後，球員喺拚搏精神方面確有改善，不過整體演出水準並唔算高，兩大攻擊主力柏歷同伊利斯域因傷缺陣對攻力打擊甚大，球隊今仗更鬧中堅荒，拉積高域上仗被逐要停賽，謝菲布馬亦因傷缺陣，韋斯達文要重彈舊調客串之餘，季初因甩漏太多被雪藏嘅文切尼亦要解凍頂檔，球隊攻守都有隱憂。


林志堅入選德國U20大軍


芬克用人亦值得批評，較早前喺暫代教練卡度素手上一炮而紅嘅港人二代林志堅，剛剛憑優異表現首次入選德國U20大軍，但喺芬克手上上陣時間極少，上仗對凱沙羅頓只後備落場十分鐘，至於另一名表現受到好評嘅南韓小將孫弘民更被打入冷宮。芬克倚重外借回歸嘅年輕鋒將馬古斯貝治，但呢名瑞典國腳喺漢堡演出一直乏善足陳。




利華古遜今季演出亦反覆，但相對人腳同整體表現都在漢堡之上，雖然啱啱喺歐聯作客不敵華倫西亞，但下半場反客為主控制戰局，高層同球迷都收貨，利華今仗決心擺大個頭強攻對手，傑斯寧、戴迪約克同舒賀爾尼將齊齊正選搏殺，中門大開嘅漢堡唔易頂，黑柴相信利華主場可勝，但基於往績居下風，估計小勝一球機會最高。