紅鑽救命波唔放過山葉

猪拉多纳

03/11/2011


日職榜尾形勢漸見明朗，包尾福岡黃蜂已降班，尾二山形山神今輪輸波即降，尾三至尾五相差五分，三隊只能活一隊！尾四球隊浦和紅鑽是日主場對磐田山葉，紅鑽換帥後續有起色，可挫風流球隊山葉！




（now 633周四下午4時直播）




經歷近兩個月聯賽不勝走勢後，浦和紅鑽上周聯賽反勝橫濱水手，暫時脫離降班區，僅領先尾三甲府風林兩分，未可掉以輕心。紅鑽新帥堀孝史重用土炮，成班波同聲同氣，踢落更具默契，射手原口元氣續成進攻重心，今場雖有中場鈴木啟太及山田直輝停賽，但勝在鬥志鮮明，仍可信賴。


山葉無求Hea踢


磐田山葉無力殺上前列，同時不愁降班，可以大踢風流波，近兩周聯賽主場出戰全數落敗，上場對住大阪櫻花淨吞四蛋，無心戀戰極不可靠。山葉有質冇Heart，季尾賽事捧唔過，反觀紅鑽明刀明槍有力贏波，蘇豪捧主勝！