拜仁拿玻里搶攻鬥大

猪拉多纳

02/11/2011
文： Mic少

A組另一場拜仁慕尼黑主場對拿玻里，兩隊雖然位處小組首兩位，但「一哥」拜仁只係領先第三位曼城三分，優勢唔大，當然要趁地利搶三分。至於拿玻里就更加冇失分空間，球隊上仗聯賽收起主將留力，就為今場一博，兩軍磨拳擦掌準備火併，最好揀入球大。（有線63及203台周四凌晨3時45分直播）

拜仁一向以歐洲超級豪門自居，基本上無論遇任何對手都會採取主攻踢法，之前三場分組賽都佔盡上風，上輪作客拿玻里亦一早打開紀錄，如非馬里奧高美斯射失十二碼，可能已全取三分而回，可見拜仁級數始終高過拿玻里一截，今場有地利優勢，贏波機會相當高，主W僅得1.2倍熱爆燈，擺明趕客。


拜仁主場平均省4粒


拜仁擁有勁旅英雄氣概，即使領先亦往往繼續搶攻，今季主場連盃賽九戰，只有首輪聯賽冇入波，其後八次主場全勝共轟入三十三球，換言之平均每場入多過四球，單靠自己都夠開大，相信今次都唔會手軟。


拿玻里難得可以參加歐聯，態度格外認真，每逢歐聯前一場聯賽都例牌留力，上仗作客卡坦尼亞，正選陣容中收起大勇嘅馬治奧同咸錫，加上有半場時間打少一人，輸波亦屬合理，但今仗打真軍，隨時有脫胎換骨演出，絕對不能小覷。尤其係射手卡雲尼上仗打破入球荒，信心返晒來，會為主隊帶來相當大威脅。就算拿玻里今場贏唔到，亦應可取得入球