熟人帶路利華淘堡

猪拉多纳

28/10/2011
文： 蘇斯黑柴

德甲獨腳戲弗賴堡主場迎戰利華古遜，今仗係利華古遜少帥杜特首次領軍重返佢嘅成名地，遇上一班佢熟悉嘅舊同僚，知己知彼下應該更容易搵到破敵之策，事實上弗賴堡今季冇咗杜特整體演出亦嚴重下滑，今仗主場都唔睇好，黑柴捧利華客Ｗ。




（有線61及201台周六凌晨2時30分直播）




少帥杜特倒戈弗賴堡




杜特○七年入主弗賴堡，○九年帶領球隊以德乙冠軍身份重返德甲，上季仲取得德甲第九名，對呢支細球會嚟講絕對係超額完成，佢嘅優異成績得到利華古遜賞識，上季中已敲定今季取代入主拜仁嘅軒歷基斯教職，利華古遜過去已經長期恰慣弗賴堡，近三次南征去到巴德諾法球場全勝，共轟入九球只失一球，如今加埋對主隊瞭如指掌嘅杜特領軍，勝算自然再多幾分。


利華老少孖寶上晒力


弗賴堡今季改由疏治領軍，佢過去只有帶領德丙球隊經驗，無論功力同經驗都無法同杜特相比，喺佢帶領下弗賴堡明顯攻守失衡，近期仲愈踢愈曳，近六戰五敗已經跌到包尾，成隊波倚靠箭頭柏比斯施斯一個，但佢近期明顯腳風唔順，前仗對漢堡射失十二碼，上仗對凱沙羅頓亦痛失良機；利華古遜上場聯賽不敵回勇嘅史浩克，但之前四場正式賽事三勝一和，包括歐聯反勝勁旅華倫西亞，年輕鋒將舒賀爾尼大熟大勇，老將波歷克亦全面復甦，今仗更有守將卡斯特羅停滿復出，人腳復整，有足夠條件繼續做弗賴堡剋星。