紅軍強陣攻「城」搶盃仔

猪拉多纳

26/10/2011
文： 自由恒

還記得上周中嘅歐聯之夜，冇份參戰嘅利物浦卻不甘寂寞，竟然得閒到同格拉斯哥流浪踢咗場熱身賽，仲要係夫添出擊，既然無關痛癢嘅友賽都咁熱心，相信佢哋極可能係全英超最認真對待英格蘭聯賽盃嘅一隊，今晚16強造訪史篤城要撐1.95倍客W。（now638台周四凌晨2:45直播）




老實講，以利物浦現時嘅處境，爭聯賽冠軍似乎太大想頭，歐洲賽又唔使踢，唔爭英聯盃仲有咩好做吖。以佢哋龐大嘅班底，其實分開A、B隊都仲得，但偏偏就冇喺英聯盃起用太多副選，對上兩圈作客埃克塞特同埋白禮頓兩隊低組別球隊，仍然搵門將連拿同埋射手蘇亞雷斯打正選，就知佢哋誠意十足，冠軍有7倍不妨買定先。


史篤城難應付3條戰線


史篤城係就係開季主場不敗，不過同時間要應付聯賽同歐霸盃，以佢哋嘅人腳實在冇條件再爭盃仔，領隊佩尼斯嘅部署亦好小心，上圈主場對住熱刺，兩大王牌高治同埋戴納都冇打正選，就知佢哋心態係點，今仗對住有一定決心嘅利物浦，係時候行人止步。