車仔嗒糖送魚生粥

猪拉多纳

15/10/2011
文： 安高

畀國際賽打斷聯賽2連勝氣勢嘅車路士，今晚英超夜場喺主場迎戰愛華頓，論實力雖然佔先，但考慮到「拖肥糖」自06年起到臨史丹福橋未輸過，就算近排狀態回落，都唔似會大敗。安高今場博車仔小勝而歸，要3.5倍「讓球和」。（有線200、300及廣東體育周日凌晨0:30直播）


愛華頓踢單箭頭死守


輸完畀曼聯之後，車仔終於搵番節奏接連大炒史雲斯同保頓，總算搵番信心。可惜之後撞正國際賽期，成班巨星踢完國際賽啱啱歸隊，未必完全回得切氣，發揮難免受到影響。再者，佢哋近排受到搬主場事宜影響，球迷今仗入嚟未必全心打氣，隨時掛住搞抗議，亦可能令隊波分心。至於前線繼續有費蘭度托利斯停賽，補上嘅杜奧巴狀態仲未十足，想大炒對手自然有難度。




「拖肥糖」呢邊，聯賽2連敗先後不敵利物浦同曼城，卡士明顯未及爭標分子。不過，佢哋近5次作客史丹福橋錄得全部和波，加上今仗佢哋會有前鋒安尼捷比養傷，預計會搵卡希爾頂上打單箭頭算數，做好防守先係目標，肯打死守戰術，車仔今仗應該炒唔起呢粒「拖肥糖」。