科蘭爭做烏拉圭No.1

猪拉多纳

09/10/2011
文： 力奇

嚟緊周中繼續國際賽擔大旗，歐國盃打到最後一輪，戰意先係揀波最重要一環，反而南美洲區世盃外圍賽啱啱開波，隊隊都冇保留，應該更好賭。當中烏拉圭會再鬥美洲盃決賽嘅手下敗將巴拉圭，前者尋日朝贏玻利維亞踢得精彩，仲有科蘭爭做國家史上第一射手，夠戰意兼好狀態，應該贏得。


周中再鬥手下敗將巴拉圭


烏拉圭尋日朝喺主場迎戰玻利維亞，結果靠盧根奴梅開二度，加上卡雲尼同蘇亞雷斯各入一粒，輕鬆贏4:2。佢哋今夏喺美洲盃力壓群雄封王，信心鬼咁好，家陣又旗開得勝，再鬥啱啱吞咗秘魯兩蛋嘅巴拉圭，勝望的確幾高，作客亦會好分啲添！值得一提，今仗屢失良機嘅射手科蘭，依家同經典名將史卡朗尼同以31球並列烏國史上射手榜第一，想獨佔鰲頭，梗會加多兩錢肉緊啦！