飛腳冇4件讓唔起紅鑽

猪拉多纳

09/10/2011
文： 走肖

日聯盃4強大戰今日爆發，浦和紅鑽喺主場對大阪飛腳，曾經係東瀛球壇最強戲碼，雖然紅鑽近年落難，但飛腳近排行衰運，加地亮同明神智和輪流受傷，李根鎬同遠藤保仁又去咗踢世盃外圍賽，呢場至少有4個正選缺陣，作客讓波要「讓球主勝」。（開賽時間：周日下午4:00）


紅鑽馬斯奧李察迪斯刑滿復出


自從紅鑽喺07年贏得亞冠盃後，似乎就未好過，今季仲衰到要護級，日聯盃係佢哋挽回尊嚴最佳出路，即使翼鋒原口元氣同中堅史柏拉洛域分別被日本同澳洲國家隊徵召，中場山田直輝停賽，仲有柏木陽介、永田充頂住，特別係中場馬斯奧李察迪斯都坐完波監復出，陣容相對完整，搭埋鬥志實夠踢。




至於08年亞冠盃盟主飛腳，今仗有前鋒李根鎬同中場遠藤保仁缺陣，原本影響已好大，點知近日佢哋再有右閘加地亮同中場明神智和傷埋，唔好忘記，佢哋季中有射手阿祖安奴費拉拿同新星宇佐美貴史離隊，依家讓多4件，教練西野朗淨係諗點排陣，隨時頭都爆，對住冤家紅鑽未必可以90分鐘解決對手。


日聯盃賽制


今輪為4強戰，以一場過分勝負，若法定時間內打成平手，則需加時作賽，再和則互射12碼決勝。