蘇格蘭作客做細界

猪拉多纳

08/10/2011
文： 法比加輝

歐洲國家盃外圍賽Ｉ組賽事，列支敦士登主場對蘇格蘭，雖然客隊要贏波爭小組次名，但蘇格蘭從來都唔係攻力強嘅球隊，加上佢哋作客冇料到，而且隊長費查缺陣，所以加輝認為就算贏波都只能小勝，建議捧1.83倍入球細。（now 632周日凌晨1時30分直播）




I組形勢尚算明朗，西班牙肯定以首名出線，而立陶宛與列支敦士登就已經出局，所以餘下嘅捷克與蘇格蘭會爭次名。論形勢蘇格蘭較差，未計今輪賽事前落後捷克兩分，所以必須要捷克失分先有機會出線，而蘇格蘭餘下兩場分別對列支敦士登及西班牙，今場絕對係搶分良機，冇失分空間。


蘇軍火力疲弱


只可惜蘇格蘭攻力一向麻麻，對手呢塊「魚腩」未必容易食落肚，蘇格蘭前鋒線近年青黃不接，除堅尼米拿之外，一直都冇優質前鋒上位，就好似今次有份入選嘅葛維尼及馬卡爾史密夫，其實都未試過替國家隊入波。再睇埋中場線，入波超過兩球嘅球員就只有費查，今仗佢仲要因病缺陣，攻力又減一截。




再者蘇格蘭一向都係「地頭蟲」，近八場作客未嘗一勝。睇番今次外圍賽，蘇格蘭作客未贏過之餘，更加一球波都未入過，既然作客咁唔掂，好難睇好蘇格蘭今場會大炒，加輝建議捧入球細。