日本喪攻越南大炒格

猪拉多纳

07/10/2011
文： 蘇豪

國際賽檔期亞洲區列強群起進行熱身賽，日本會於主場對越南，日軍最近幾場國際賽入球率偏低，鋒力似有啞火迹象，故主帥沙哲朗尼決定喺今仗改踢343全攻型陣式，借實力較弱嘅越南嚟測試火力，目前球隊前線有人滿之患，個個都要爭位，故落到場肯定盡情喪攻對手，必捧「讓球主勝」！


（周五晚6時45分開賽）

南韓波蘭「細」均力敵

日本近6戰5場保持不失，防守硬淨，但6場波加埋只入得5球，火力只屬一般。有見及此，主帥沙哲朗尼計劃於今場試踢343，前線或以藤本淳吾、夏雲拿同岡崎慎司組成進攻鐵三角，亦有機會搵李忠成及原口元氣等人一試，擺明車馬喪攻越南，大捷可期，讓幾多都冇有怕。


同日另一支亞洲勁旅南韓主場迎戰波蘭，南韓召入効力阿仙奴嘅王牌前鋒朴主永，而另一射手李東國亦當弗，前線攻力唔使懷疑，不過，快翼李青龍因傷未有入選，老大哥朴智星又已退出國家隊，中場線實力削弱不少。今仗面對波蘭話晒係歐洲二線隊，身形輸蝕，優勢唔算明顯，故戰情預計會好接近，亦難出現有大手交易，故捧入球細最正路。