葡萄牙U21雙塔爆破波蘭

猪拉多纳

06/10/2011
文： 力奇

U21歐國盃外圍賽第6組（F組）今晚有直播，由葡萄牙U21主場迎戰波蘭U21，力奇睇好1.88倍「讓球主勝」。葡萄牙青訓人才輩出，家陣嘅前線雙塔又係入球保證，對住質素有限嘅波蘭小國腳，唔難大捷。（有線155周五凌晨4:00直播）

雷爾方迪兵工廠出品

葡萄牙U21喺小組首戰以2:0贏摩爾多瓦，表現對辦贏得輕鬆。効力愛斯賓奴嘅隊長雷爾方迪上仗完場前入波鎖定勝局，呢位身高6呎前鋒出身阿仙奴，扭得兼射得，目前累積4個入波係球隊首席射手。至於佢前線拍檔祖奧施華身高6呎2吋，今季由愛華頓外借去葡超塞圖巴爾，已經入咗3球，同樣唔嘢小，加埋奧漢倫斯前鋒威爾遜般奴把握力亦唔差，要撕破波蘭防線應該唔難。


波蘭U21呢邊，睇勻個陣容，外流嘅就只得漢諾威前鋒艾杜亞蘇比治、禾夫斯堡中場基列治與波爾多中場基祖華克，整體實力唔算突出。佢哋喺分組賽2戰只得1勝1負，主場對住俄羅斯都要淨吞2蛋，今次作客葡萄牙都係輸少當贏啦！