聖保羅陪高士路捱「細」界

猪拉多纳

05/10/2011
文： 朱楓

高士路同聖保羅兩支近況低沉嘅球隊，聽朝將喺巴甲交手，捧1.75倍入球細就最好路！事關高士路換帥後持續低迷，射手基利臣依舊唔獲重用，對家聖保羅受停賽同國際賽影響，有3大主力缺陣，兩隊殘鬥殘，你話入波點會多？（開賽時間：周四早上8:50）




係人都知巴甲鍾意換教練，但好似高士路今季換到咁密就真係非常罕見，打咗27場已經換咗4名教練，上場作客甘美奧，由新帥華格拿文仙尼首度領軍，點知最後都輸0:2，近8場聯賽未贏過，追平球隊史上最長不勝紀錄，賽後華格拿文仙尼解釋隊波持續不振，全因球員欠缺信心，話希望進行大改革，首要係改善球員集中力喎。


高士路近5戰入得1球


其實高士路都唔係冇球星孭飛，好似巴塞借將前鋒基利臣都幾有卡士，不過上場佢連後備出場機會都冇，賽後華格拿文仙尼批評佢唔夠力量，難怪隊波近5場只入得1球，就算有中場馬昆奴斯柏拉拿刑滿復出都冇計。




早排大勇、一度升上次席嘅聖保羅，近日狀態就突然急跌，上場主場不敵法林明高1:2後，已經連續3場未贏過，聽朝作客高士路，仲有中場盧卡斯洛迪古斯同威靈頓艾巴里斯杜停賽，後衞艾雲比利斯亦返咗巴拉圭向國家隊報到，本來久休嘅前鋒路爾斯法比安奴上場終於復出，但打咗60分鐘已被換走，擺明就係冇態，靠38歲嘅李華度攻堅，試問可以入到幾多球？