銀河惡客劏牛 贏波即攞常規賽冠軍

猪拉多纳

04/10/2011
文： 力奇

亨利大戰碧咸！美職聯聽朝上演超級大戰，由紐約紅牛主場迎戰洛杉磯銀河。銀河今仗贏波即刻可以鎖定常規賽冠軍之位，鬥志最夠保證，加上狀態佔先，唔難擊敗單靠亨利單天保至尊嘅紅牛，2.52倍客勝要捧！（now633及660台周三早上8:00直播）




上季喺季後賽決賽飲恨而回嘅銀河，今季決心爭冠，至今喺常規賽踢咗31場得18勝10和3負得64分，喺剩番3周帶離次席西雅圖海灣者7分，只要今晚贏波，即刻宣布常規賽封王。球隊近4場聯賽全勝，氣勢勁爆，上仗對住皇家鹽湖城，仲要係半場落後1球下反勝2:1，強勁鬥志可見一斑。


碧咸助攻能力不減


不老傳奇碧咸今季繼續有料到，連同上仗又貢獻助攻，今季合共錄得15個助攻，「七旋斬」依然唔講得笑。前線愛爾蘭國腳羅比堅尼雖然已經飛咗返歐洲備戰歐國盃外圍賽，不過佢哋仲有美國國家隊入球王當路雲孭飛，再加埋入球能力唔差嘅麥基，唔愁冇波入。


紅牛馬基斯冇料到


紅牛呢邊，家陣總排名第10，掹車邊黐住喺季後賽區域，之但係保唔保得住到季尾真係難講。無疑兩隊同樣鬥志十足，但紅牛自從7月中開始演出真係明顯跌Watt，近12場聯賽就只得2勝6和4負，由巴塞加盟嘅高薪球星馬基斯，嚟到踢防中表現備受抨擊，話佢拖低班波。至於射手亨利雖然今季回勇，依家入咗13球排喺射手榜次席，上仗仲要係靠佢完場前入波扳平，弊在始終單天難保至尊，加上德國門神路斯加盟後表現都未如理想，平均每場失1.6球，有前冇後，邊信得過吖！