維拉利爾地頭「薩」無赦

猪拉多纳

01/10/2011
文： 鄭少偉

香港球迷真係好幸福，唔單止各大聯賽都有得睇，每年暑假仲有唔少歐洲勁旅東來獻技！其實唔止球迷興奮，我同好多行家都勁High，梗係啦，有機會同班球星交手喎！當中「亨利」對維拉利爾印象最深，佢哋今晚喺主場迎戰薩拉戈薩，「亨利」撐硬潛艇！（now632及660、廣東體育周日凌晨0:00直播）




「亨利」先講講維拉利爾之前7月訪港嘅花絮先，通常對外隊前一日，甲組會都會搞歡迎宴，有飲有食有表演，當晚傑志就邀請咗肥媽做嘉賓，肥媽搞氣氛真係冇得彈，一嚟就唱首西班牙文歌，聽到班潛艇球員鬼咁High，之後成班球星仲聞歌起舞，勁開心！可能之前一晚Friend咗，所以賽後佢哋無論影相、換波衫都冇托手肘，Very Nice！


薩拉戈薩失球冠西甲


比賽期間同高手過招，真係學到唔少嘢，當中小弟最欣賞中場「光頭神探」保查華利路，佢踢法鬼咁瀟灑，我幾次想埋去用超技術踢佢，都畀佢一兩下假腳將我甩開，好在嗰次佢哋嘅前線孖寶羅斯仔同尼爾馬冇嚟，唔係輸得仲甘！雖然今晚羅斯有傷上陣成疑，但都仲有尼爾馬喺度，加埋保查華利路周中歐聯坐波監休戰，儲儲埋埋今晚嚟料！




客軍薩拉戈薩踢咗5輪賽事失咗11球，暫時係失波最多嘅西甲球隊，而且佢哋近6次作客「黃色潛艇」，錄得2和4負嘅劣績，睇怕今晚都好難全身而退！信實力，簡簡單單捧維拉利爾1.52倍主勝同2.5倍「讓球主勝」啦！