士砵亭發憤交到素

猪拉多纳

29/09/2011
文： 麥馬拿仁

歐霸盃D組大戰，士砵亭主場鬥拉素。士砵亭本季擴軍精明，新將雲禾夫斯雲高同舒赫斯好使好用，近期錄得四連勝。事實上佢哋好重視歐霸盃，去屆就算聯賽表現曳，歐霸都交足功課，戰意勝過拉素成條街，捧主W！




（有線63及203台周五凌晨3時05分直播）


拉素半力冇誠意


於葡超Big3中，近年以士砵亭成績較差，完全被波圖同賓菲加食住。正所謂知恥近乎勇，士軍本季發大嚟搞，季前買入嘅「荷蘭孖寶」雲禾夫斯雲高同舒赫斯季初就已經發功，近四仗一共轟入七球，而前巴塞隆拿翼鋒謝法倫亦已入局，於聯賽取得士哥。去屆歐霸盃，士砵亭於分組賽取得四勝二負，三仗主場分別大數索菲亞利夫斯基同真特，亦都贏過里爾，睇到呢班波對歐霸盃好認真。




傳統上意大利球會對歐霸盃唔會出盡全力，拉素上仗分組賽半力出擊，結果主場二比二和羅馬尼亞球隊華斯路伊。