費托車途崎嶇感激fans

猪拉多纳

28/09/2011


車路士前鋒費蘭度托利斯近期好似坐過山車一樣，經歷破入波荒、空門射失、領紅牌。佢首次承認，上「車」後首六個月日子非常難過，慶幸車仔球迷一直支持佢，先至可以捱過，所以就算近期屢受挫折都冇有怕。


「加盟首半年好辛苦」


費托話連續兩場聯賽有波入，要特別多謝球迷對佢支持：「加盟車路士首半年，真係捱得好辛苦，好彩獲得球迷體諒，每次喺街上遇到球迷，都會感受到佢哋真心支持我，近期有波入，總算可以報答球迷。」費托現時最希望將英超入波旺氣帶到歐聯。




費托對華倫西亞非常熟悉，以往効力馬德里體育會時曾八次同華倫交手，佢射入兩球。值得一提，○六年九月馬體會主場○比一不敵華倫，當時費托被逐，估唔到對華倫前夕，佢喺上仗英超又攞紅牌，唔知會唔會有心理陰影呢？