史特加大啖食漢堡

猪拉多纳

23/09/2011
文： 朱楓

換帥就一定止到血？未必！雖然漢堡啱啱改由魯度夫卡度素臨時領軍，但班波積弱多時，唔似可以即時改運，更何況佢哋今晚對手史特加賽前狂練射波，倒戈教練拉巴迪亞擺明要向舊東主報仇，一句講晒2.28倍「讓球主勝」要捧！（有線61及201周六凌晨2:30直播）




由於主場不敵慕遜加柏，開季6戰只得1和5負敬陪末席，漢堡賽後怒炒教練奧寧，改由預備組主帥魯度夫卡度素出任看守教練，同時全力搵新帥，據報前教頭史堤芬斯同前荷蘭國家隊主帥雲巴士頓都話有意接手呢個燙手山芋。


漢堡古里路打柴


不過朱楓覺得漢堡今季成績咁差，錯不在奧寧，反而係球會季前一次過放走雲尼斯達萊同艾利亞等多名主力，只由總監阿連臣挖角前球會車路士幾名靚仔補充實力就算先係致命關鍵。近日漢堡仲收到壞消息，就係後防文切尼因拉傷右腳大腿肌肉至少會缺席2場賽事，加上射手荷西古里路繼續養傷，你話仲有咩本錢反彈？


唔入罰做掌上壓


同漢堡相反，史特加今季開季成績優異，由卡卡奧、岡崎慎司、古斯曼奴域同夏歷所組成嘅「進攻四重奏」更加合作無間，開季6戰合共入8球；至於後防喺前燕豪芬中堅法蘭斯高洛迪古斯帶領下更極之硬淨，至今只失4球。可能知道漢堡近排防守勁唔掂，教練拉巴迪亞喺周四朝頭早，臨時加操安排三課射門操練畀球員，射唔入仲要罰做5下掌上壓，態度極之認真。




鬼咩！拉巴迪亞上年4月先被漢堡炒魷，量地量咗超過半年先搵到教史特加呢份工，難得史特加後衞、又係前漢堡球員保拿奴斯都出嚟和應，話唔會因漢堡依家排包尾而睇小佢哋，一定會認真對付佢哋咁話，史特加呢鋪贏面唔細口架！