兵工廠開始重建信心

猪拉多纳

17/09/2011
文： 江忠德

呢個世界冇話冇咗邊個唔得，而且疑人不用，用人不疑，阿仙奴（下圖紅衫）換血之後表現有進步，球員信心開始返晒嚟，今日同布力般隨時「大」打出手！


紅魔車仔快打快有惡鬥


兵工廠置諸死地而後生，花錢增強兵力開始有料到，喺主場險勝史雲斯，跟住歐聯作客踢和多蒙特，雖然表現仲未夠以前全盛時期咁有說服力，但係球員喺劣勢中經得起考驗，尤其係畀多蒙特猛烈轟炸都冇自亂陣腳，依家肯定要打一場漂亮勝仗，話畀大家知英超仲有阿仙奴，咪當佢哋透明！




禮拜日曼聯鍊車仔，「紅魔」周中勒住踢和賓菲加，可見費爵爺幾咁重視呢場英超大戰；相反車仔去盡砌低利華古遜，並且靜雞雞起革命，泰利同林柏特唔再係必然正選，桑馬達可以加快轉數，連費托都要轉型，唔係一定要入波至叫叻仔，二傳助攻亦係功臣，呢種改變帶嚟新鮮感，聽晚同年輕化嘅曼聯快打快，入多啲波，球迷今次有眼福！