史特加上盤要跟

猪拉多纳

16/09/2011
文： 朱楓

正所謂寧捧當頭起！今晚德甲巴登符騰堡州打吡弗賴堡主場對史特加，記住捧史特加上盤！佢哋上場大勝重拾信心，日本翼鋒岡崎慎司持續大勇，相反弗賴堡上場慘吞7蛋，射手柏比斯施斯離隊唔成明顯跌watt，今場唔似可以反彈！




（有線61及201周六凌晨2:30直播）




弗賴堡今季表現曳爆，唯一亮點係前鋒柏比斯施斯頭3場都有波入，由於表現太好，呢位塞內加爾前鋒一度獲多間英超球會招手，可惜有傳弗賴堡因為叫價太高，最後令交易無疾而終。雖然柏比斯施斯之後話轉會唔成唔覺得失望，但之後連續2場冇波入，完全冇晒火，上場對拜仁更加隱形，累球隊作客慘吞7蛋。


岡崎慎司翻生


其實弗賴堡今季防守真係好曳，連埋德國盃，近6場竟然有5場失2球或以上，預計今場喺穆迪薩有傷，可能要繼續搵中場富隆客串右閘下，後防隨時又倒水咁倒。




相比上季，史特加今季明顯有改善，上周主場更加以3:0大勝漢諾威，賽後體育總監波碧大讚球隊表現，話好希望呢股勇勢延續到今晚嘅打吡上。中場根拿、馬馬度巴哈、後防迪比亞同尼達美亞有傷在身，賽前只可以進行簡單訓練，預計今場都會缺陣，不過朱楓對史特加其他球員仍然好有信心，特別係岡崎慎司，呢位日本國腳繼今季揭幕戰對史浩克後備入替射入世界波後，上場對漢諾威擔正下更先開紀錄，足證佢今季改打翼鋒打生咗，配合德國前鋒卡卡奧，對住狀態低沉嘅弗賴堡絕對有力再下一城。