三箭山葉周末大鬥法

猪拉多纳

16/09/2011


日職球隊大阪櫻花於亞冠盃再次上演瘋狂入球騷K.O韓職勁旅全北汽車，踢來充滿鬥心，廣島三箭上場被大阪櫻花大逆轉輸四比五，進攻發揮好，但防線甩漏多，今周三箭主場對磐田山葉，相信會同山葉大手交易，捧大！




（周六晚6時開賽）




廣島三箭上場同大阪櫻花各踢半場好波，三箭上半場淨勝三球，以為穩操勝券，殊不知換邊後於三十零分鐘內連失五球，即使王牌前鋒佐藤壽人尾段再建一功，最終亦返魂乏術。三箭火力強勁，衰在後防成日騰騰震，相信短期內難有改善。


前田遼一復出即士哥


磐田山葉王牌射手前田遼一上場聯賽強勢復出，隨即取得士哥，盡顯級數，呢位星級球員產量穩定，屬日職頂級前鋒，對住三箭條豆腐防線有望再數胡。兩隊同樣位列中游，目前壓力唔大，可望放鬆心情踢場好波，預計會有唔少士哥，捧大！