費派狂魔 橫行無忌 曼聯獵殺菲鷹

猪拉多纳

14/09/2011
文： 樂比堅尼

今晚繼續上演歐聯分組賽，C組曼聯作客對「葡國飛鷹」賓菲加。紅魔鬼目前狀態之勇，真係可以話遇神殺神，基本上唔使睇對手，唔使理主場定作客，場場照捧都好難有損失，難得今場客W有1.95倍咁好分，點可以唔捧場！




（有線61及201台周四凌晨2時45分直播）




曼聯狀態有幾弗都唔使樂比仔多講，由熱身賽至今，踢咗十一場全勝，而且場場開大，射手朗尼腳風順到不得了，連續兩場連中三元後，聯賽累積入八球，加埋查維亞靴南迪斯、艾舒利楊格個個踢到曉飛，依家嘅曼聯係近年來最可怕時候，你一係唔買呢場，要買就根本冇得同紅魔作對！


賓菲加攻強於守仲死


當然，樂比仔明白歐聯同聯賽係兩回事，曼聯過去歐聯作客成績亦常有失手，以○五年為例，就曾試過作客不敵賓菲加，但近年足球生態改變，呢一、兩年已不斷打破咗好多所謂宿命同數據，目前歐洲球壇貧富懸殊，好似賓菲加呢類攻強於守嘅二線球隊，根本難敵四年內三度打入歐聯決賽嘅曼聯！




曼聯今場唯一隱憂就係下場聯賽要硬撼車路士，但目前正值季初，球隊又咁順，費格遜根本冇必要刻意留力，打窒自己道氣，而且班後生仔根本不知留力為何物，場場去到盡，今場屬歐聯首仗，肯定加多幾錢肉緊。陣營消息方面，韋碧克、湯卡華利及里奧費迪南養傷，卡域克及費查有機會登場，曼聯板櫈深度夠，相信影響唔大。