保亞斯掟費托入雪櫃

猪拉多纳

13/09/2011

保亞斯英明果斷，今場歐聯大戰利華古遜，以及嚟緊周日英超大戰曼聯，都會棄用「冇牙老虎」費蘭度托利斯！車路士新帥保亞斯對「王子」差勁表現忍無可忍，決定重用剛射破新特蘭大門嘅史杜列治，將費托擺入雪櫃。


費托今年一月以五千萬鎊加盟後，迄今正式賽事只入過一球，表現曳到離晒譜。保帥今季執教畀足面，首三場聯賽都派「王子」打正選，但佢依然夢遊球場冇貨交。上仗對「黑貓」費托終坐冷板，史杜列治被委以重任並射入一粒，邊個有用邊個敗家，一目了然。

點名重用史杜列治

本周對車仔非常重要，保帥間接表示會棄用費托：「好多球會都想借走史杜列治，但佢絕對係車仔重要一員，我好慶幸佢仍在陣中。我哋必須於歐聯打響頭炮，嚟緊鬥曼聯對爭標有幾關鍵，唔使再多講。我需要狀態最好嘅十一名球員落場，球員唔夠弗就要休息。」