阿仙奴重燃信心追多鋪

猪拉多纳

13/09/2011
文： 樂比堅尼

歐聯分組賽F組重頭戲，多蒙特主場迎戰阿仙奴。「蜜蜂兵團」闊別歐洲舞台多年，今屆雄心壯志希望幹一番大業，但歐聯未開波，聯賽已搞到一頭煙，完全冇晒上季嘅霸氣，睇怕多蒙特踢歐聯都係得一年貨仔，今仗隨時成為「兵工廠」炮灰，樂比仔捧受讓嘅阿仙奴「讓球客勝」！


（有線64及204台周三凌晨2時45分直播）


多蒙特上季鋒芒畢露，奪得聯賽錦標可謂實至名歸，但呢啲突然冒起嘅球隊通常見光即死，正所謂創業難守業更難，多蒙特成為眾矢之的後，要保持上季嘅成績相當困難，今季踢咗五場聯賽僅得兩勝一和二負成績，所贏兩場係實力平庸嘅紐倫堡及漢堡，就知多蒙特今季牙煙！

多蒙特未夠班讓波

事實上，多蒙特歐戰經驗貧乏，而且年輕球員太多，未必有足夠經驗作出調整，應付兩條戰線更唔容易，尤其係多蒙特攻強於守，對住水平較低嘅本土聯賽尚可應付，但對住高水平嘅對手相當輸蝕，即使上場聯賽停賽嘅馬里奧葛斯復出，亦未必夠班讓得起阿仙奴。


阿仙奴上仗聯賽全靠對方門將送大禮，小勝史雲斯一比○，整體表現令人失望。不過領隊雲格已收貨，話呢場勝仗大大提升球員嘅信心，雖然阿仙奴喺英超惡唔出樣，但去到歐聯場合仍然係超晒班，淨係睇外圍賽兩勝烏甸尼斯，就足以證明此說法。多蒙特想贏波？交吓學費先啦！