史浩克士氣蓋禾堡

猪拉多纳

11/09/2011
文： 蘇斯黑柴

成績就是一切，今晚德甲第五輪壓軸戲禾夫斯堡主場對史浩克04，兩軍近績同大營氣氛各走極端，禾堡教頭馬加夫近期發晒癲亂咁罰人，搞到民怨沸騰；相反史浩克教練蘭歷克錫到班球員燶，成班波士氣好到加零一，淨係呢一點，已經足夠支持黑柴撐客軍。（有線61及201台周日晚11時30分直播）

禾堡近期三連敗，教練馬加夫輸到躁晒，前仗輸畀慕遜加柏後，以一對箭頭希美斯同文迪蘇傑失波後冇積極回防為理由，各罰佢哋一萬歐元，結果搞到人心盡失，上仗遇上弱旅弗賴堡淨吞三蛋。馬加夫今季留唔住質高嘅沙斯查列達、加菲迪、迪亞高同卡積亞，反而引入沙歷咸美斯、希斯佩加、基傑亞高斯、希比同基斯馬干等大批過氣球員，球隊平均質素愈趨平庸。


蘭歷克魯爾糖黐豆


另一邊廂，史浩克教頭蘭歷克季前曾經同大牌射手魯爾有過節，不過隨住魯爾決定留隊，近期聯賽三連勝兼歐霸盃殺入分組賽，魯爾都有優異演出，蘭歷克當堂轉晒嘴臉，重新給予魯爾特權，兩人喺操練中更係糖黐豆雞啄唔斷，氣氛好得出奇。除咗魯爾，球隊前線亨特拉爾同法芬都弗爆，今晚史浩克氣勢如虹，平手盤必捧。