委內瑞拉客勝「根」得過

猪拉多纳

02/09/2011
文： 洪心 Dee

畀人當二打六嘅委內瑞拉，今晚喺印度加爾各答中立場同阿根廷拍跳，為咗證明佢哋喺美洲盃得第4絕無符碌肯定搏命；反觀阿根廷人腳變動唔大難有突破，阿Dee寧願冷敲委內瑞拉3.35倍「讓球客勝」。（開賽時間：周五晚9:30）




委內瑞拉早前喺美洲盃勇闖4強，成績更勝8強出局嘅阿根廷。之但係佢哋今次嚟到印度就畀主辦單位Celebrity Management Group（CMG）當臭四，據聞當地唔少嘅宣傳廣告，除咗用美斯大頭配上阿根廷大軍之外，另一邊竟然將委內瑞拉搞錯用咗巴拉圭嘅相，認真失禮。


阿根廷點兵換湯唔換藥


更加搞笑係，委內瑞拉前日就連想練波都唔得，皆因經CMG安排嘅大軍行李運送，竟然送錯晒去西班牙馬德里。想話補鑊咩？當地波衫又話唔啱委軍球員Size，搞到冇衫練波。成班波畀人玩到謝，你話今仗仲唔搏命踢爭氣波咩！




阿根廷呢邊，新帥沙貝拉上任後首度領軍，佢仲委任埋美斯做新隊長，希望出現一番新局面。但咪話阿Dee潑冷水，今次點兵又係換湯唔換藥，同美洲盃相比，只係冇選泰維斯、辛尼迪同加高，補番入迪米捷利斯同路爾斯干沙利斯，預計陣容、踢法變動唔大，想扭轉頹勢唔易。